Ir-reviżjoni hija parti importanti mill-proċess professjonali tat-traduzzjoni. Meta nirrevedi traduzzjoni, ma nikkoreġix biss il-Malti iżda nivverifika r-rabta bejn l-il-lingwa sors u t-traduzzjoni.

Nara fost l-oħrajn:

• jekk it-tifsira sħiħa tal-oriġinal inqalbitx;
• jekk hemmx informazzjoni li tħalliet barra jew żdiedet bi żball;
• jekk it-ton u r-reġistru ġewx adattati b’mod xieraq;
• jekk l-isfumaturi tal-oriġinal inżammux;
• jekk it-terminoloġija hijiex preċiża u konsistenti;
• u jekk it-test Malti jinqarax b’mod naturali.

Dan huwa partikolarment importanti f’testi istituzzjonali, tekniċi u speċjalizzati, fejn differenza żgħira fit-tifsira tista’ tkun tfisser ħafna.

Ir-reviżjoni mhijiex limitata għat-traduzzjonijiet. Nirrevedi wkoll testi li nkitbu oriġinarjament bil-Malti u li jeħtieġu daqqa t’għajn professjonali qabel ma jiġu ppubblikati jew jintużaw.

F’dan il-każ, l-attenzjoni tkun fuq il-kwalità tal-Malti nnifsu: il-grammatika, is-sintassi, l-għażla tal-kliem, iċ-ċarezza, in-naturalezza, it-ton, ir-reġistru u l-konsistenza. L-għan mhuwiex li nbiddel il-vuċi tal-awtur, iżda li nsaħħaħ it-test mingħajr ma nbiddel dak li jrid jgħid.

01. NIFHEM L-ORIĠINAL

Meta nirrevedi traduzzjoni, l-ewwel jeħtieġ li nifhem it-test sors. Dan jinkludi l-kontenut, l-iskop, il-kuntest, l-udjenza u t-terminoloġija tiegħu.

B’hekk inkun nista’ niddistingwi bejn traduzzjoni li sempliċement tidher tajba bil-Malti u waħda li fil-fatt twassal dak li jgħid l-oriġinal.

02. INQABBEL IŻ-ŻEWĠ TESTI

Inqabbel it-test bil-Malti mal-oriġinal biex nidentifika żbalji fit-tifsira, ommissjonijiet, żidiet bi żball, traduzzjonijiet  mhumiex preċiżi u sfumaturi li setgħu ntilfu fil-proċess tat-traduzzjoni.

Nara wkoll kif l-istruttura u t-ton tal-oriġinal ġew adattati għall-Malti.

03. NIĊĊEKKJA L-LINGWA

Test jista’ jwassal it-tifsira tal-oriġinal u xorta waħda jkollu Malti dgħajjef.

Għalhekk, nivverifika l-grammatika, is-sintassi, l-għażla tal-kliem, il-punteġġjatura, in-naturalezza tal-formulazzjoni u kif l-ideat jintrabtu flimkien.

Fejn ikun meħtieġ, nirranġa l-formulazzjoni biex it-test ikun aktar ċar u mexxej.

04. NIVVERIFIKA T-TERMINOLOĠIJA

Fit-testi tekniċi u speċjalizzati, il-preċiżjoni terminoloġika hija essenzjali.

Niċċekkja jekk it-termini użati humiex korretti fil-qasam partikolari, xierqa għall-kuntest u konsistenti matul it-test kollu. Fejn ikun meħtieġ, nagħmel aktar riċerka biex nivverifika l-użu tat-termini u l-kunċetti li jirreferu għalihom.

05. NIRFINA T-TEST

Fl-aħħar nett, nara li l-bidliet kollha jaħdmu flimkien u li t-test ikun konsistenti mill-bidu sal-aħħar.

L-għan huwa li nibqa’ leali lejn il-kontenut u l-vuċi tiegħu filwaqt li noqgħod attent li l-Malti jkun kemm jista’ jkun preċiż, ċar u idjomatiku.

Fir-reviżjoni ta’ traduzzjoni, nistaqsi jekk it-test Malti jwassalx b’mod korrett dak li jgħid l-oriġinal, jekk it-terminoloġija hijiex preċiża, jekk it-ton u l-intenzjoni ġewx trasferiti u jekk il-lingwa hijiex naturali u xierqa għall-kuntest.

Il-qari tal-provi huwa kontroll finali qabel il-pubblikazzjoni, aktar iffukat fuq żbalji bħal ortografija, punteġġjatura, żbalji tat-tipa, u dettalji tipografiċi.

Għalhekk, reviżjoni tista’ titqies bħala parti mill-proċess tat-traduzzjoni, filwaqt li l-qari tal-provi huwa kontroll finali tat-test.

Testi istituzzjonali
Rapporti, dokumenti amministrattivi, komunikazzjonijiet u pubblikazzjonijiet.

Testi professjonali
Dokumenti korporattivi, materjal għall-klijenti u dokumentazzjoni professjonali.

Testi tekniċi u speċjalizzati
Testi li fihom terminoloġija speċifika u li jeħtieġu attenzjoni partikolari għall-preċiżjoni.

Kontenut diġitali
Siti web, artikli, paġni informattivi u kontenut ieħor għall-pubblikazzjoni online.

Traduzzjonijiet
Traduzzjonijiet mill-Ingliż, il-Franċiż, it-Taljan jew l-Olandiż għall-Malti li jeħtieġu reviżjoni indipendenti.